ਵਿਸਤਾਰਾ ਏਅਰਲਾਈਨਜ਼ ਦੀਆਂ ਉਡਾਣਾਂ ਦੇ ਰੱਦ ਹੋਣ ਅਤੇ ਯਾਤਰੀਆਂ ਦੀ ਵਧੇਰੇ ਡਿਮਾਂਡ ਕਾਰਨ ਹਵਾਈ ਕਿਰਾਇਆ ਪਹਿਲਾਂ ਹੀ 20-25 ਫੀਸਦੀ ਵਧ ਗਿਆ ਹੈ। ਮਾਹਰਾਂ ਅਨੁਸਾਰ ਹਰ ਸਾਲ ਗਰਮੀਆਂ ਦੇ ਮੌਸਮ ਦੌਰਾਨ ਹਵਾਈ ਯਾਤਰਾ ਦੀ ਮੰਗ ਜ਼ਿਆਦਾ ਰਹਿੰਦੀ ਹੈ। ਪਰ ਇਸ ਸਾਲ ਹਵਾਬਾਜ਼ੀ ਵਿਭਾਗ ਨੂੰ ਮੰਗ ਦੇ ਅਨੁਸਾਰ ਸਮਰੱਥਾ ਵਧਾਉਣ ਵਿੱਚ ਕਈ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਹ ਘਰੇਲੂ ਰੂਟਾਂ ‘ਤੇ ਵੀ ਵੱਡੇ ਜਹਾਜ਼ਾਂ ਦੀ ਵਰਤੋਂ ਕਰ ਰਿਹਾ ਹੈ। ਜਿਸ ਕਾਰਨ ਹਵਾਈ ਯਾਤਰੀਆਂ ਨੂੰ ਗਰਮੀਆਂ ਵਿੱਚ ਘਰੇਲੂ ਉਡਾਣਾਂ ਲਈ ਵੱਧ ਕਿਰਾਏ ਦੇਣੇ ਪੈਣਗੇ।

ਇਸ ਸਮੇਂ ਦੌਰਾਨ ਟਾਟਾ ਗਰੁੱਪ ਦੀ ਵਿਸਤਾਰਾ ਏਅਰਲਾਈਨ ਦੀਆਂ ਸੌ ਤੋਂ ਵੱਧ ਉਡਾਣਾਂ ਦੇ ਰੱਦ ਹੋਣ ਕਾਰਨ ਹਵਾਈ ਕਿਰਾਇਆ ਪਹਿਲਾਂ ਹੀ ਵਧ ਗਿਆ ਹੈ। ਪਾਇਲਟਾਂ ਦੇ ਗੁੱਸੇ ਦਾ ਸਾਹਮਣਾ ਕਰਦੇ ਹੋਏ ਏਅਰਲਾਈਨ ਨੇ ਆਪਣੀ ਕੁੱਲ ਸਮਰੱਥਾ ਪ੍ਰਤੀ ਦਿਨ 25-30 ਉਡਾਣਾਂ ਯਾਨੀ 10 ਫੀਸਦੀ ਤੱਕ ਘਟਾ ਦਿੱਤੀ ਹੈ। ਟ੍ਰੈਵਲ ਵੈੱਬਸਾਈਟ Ixigo ਦੇ ਵਿਸ਼ਲੇਸ਼ਣ ਤੋਂ ਪਤਾ ਲੱਗਾ ਹੈ ਕਿ 1 ਤੋਂ 7 ਅਪ੍ਰੈਲ ਦੀ ਮਿਆਦ ਦੇ ਮੁਕਾਬਲੇ ਕੁਝ ਏਅਰਲਾਈਨਾਂ ਦੇ ਕਿਰਾਏ 39 ਫੀਸਦੀ ਤੱਕ ਵੱਧ ਗਏ ਹਨ। ਇਸ ਸਮੇਂ ਦੌਰਾਨ ਦਿੱਲੀ-ਬੈਂਗਲੁਰੂ ਉਡਾਣਾਂ ਲਈ ਇਕ ਤਰਫਾ ਕਿਰਾਇਆ 39 ਪ੍ਰਤੀਸ਼ਤ ਵਧਿਆ ਹੈ, ਜਦੋਂ ਕਿ ਦਿੱਲੀ-ਸ਼੍ਰੀਨਗਰ ਉਡਾਣਾਂ ਵਿੱਚ 30 ਪ੍ਰਤੀਸ਼ਤ ਦਾ ਵਾਧਾ ਹੋਇਆ ਹੈ।

ਵਿਸ਼ਲੇਸ਼ਣ ਮੁਤਾਬਕ ਦਿੱਲੀ-ਮੁੰਬਈ ਫਲਾਈਟ  ਸਰਵਿਸਸ ਦੇ ਮਾਮਲੇ ‘ਚ ਕਿਰਾਏ ‘ਚ 12 ਫੀਸਦੀ ਅਤੇ ਮੁੰਬਈ-ਦਿੱਲੀ ਸਰਵਿਸਸ ਦੇ ਮਾਮਲੇ ‘ਚ ਅੱਠ ਫੀਸਦੀ ਵਾਧਾ ਹੋਇਆ ਹੈ। ਟਰੈਵਲ ਪੋਰਟਲ ਯਾਤਰਾ ਔਨਲਾਈਨ ਦੇ ਸੀਨੀਅਰ ਉਪ ਪ੍ਰਧਾਨ (ਏਅਰਕ੍ਰਾਫਟ ਅਤੇ ਹੋਟਲ ਬਿਜ਼ਨਸ) ਭਰਤ ਮਲਿਕ ਨੇ ਕਿਹਾ ਕਿ ਮੌਜੂਦਾ ਗਰਮੀਆਂ ਦੀ ਫਲਾਈਟ ਸ਼ਡਿਊਲ ‘ਚ ਘਰੇਲੂ ਅਤੇ ਅੰਤਰਰਾਸ਼ਟਰੀ ਦੋਵਾਂ ਰੂਟਾਂ ਨੂੰ ਕਵਰ ਕਰਦੇ ਹੋਏ ਔਸਤ ਹਵਾਈ ਕਿਰਾਏ 20-25 ਫੀਸਦੀ ਦੇ ਵਿਚਕਾਰ ਵਧਣ ਦਾ ਅਨੁਮਾਨ ਹੈ।

ਮਲਿਕ ਨੇ ਕਿਹਾ, “ਵਿਸਤਾਰਾ ਦੀਆਂ ਫਲਾਈਟਾਂ ‘ਚ 10 ਫੀਸਦੀ ਦੀ ਕਟੌਤੀ ਕਰਨ ਦੇ ਫੈਸਲੇ ਨੇ ਪ੍ਰਮੁੱਖ ਘਰੇਲੂ ਰੂਟਾਂ ‘ਤੇ ਟਿਕਟਾਂ ਦੀਆਂ ਕੀਮਤਾਂ ‘ਤੇ ਅਸਰ ਪਾਇਆ ਹੈ। ਅਸੀਂ ਕਿਰਾਏ ‘ਚ ਮਹੱਤਵਪੂਰਨ ਵਾਧਾ ਦੇਖਿਆ ਹੈ। ਦਿੱਲੀ-ਗੋਆ, ਦਿੱਲੀ-ਕੋਚੀ, ਦਿੱਲੀ-ਜੰਮੂ ਅਤੇ ਦਿੱਲੀ-ਸ਼੍ਰੀਨਗਰ’ ‘ਵਰਗੇ ਮੁੱਖ ਮਾਰਗਾਂ ਉੱਪਰ ਕੀਮਤਾਂ ਵਿੱਚ ਲਗਭਗ 20-25 ਫੀਸਦੀ ਦਾ ਵਾਧਾ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਹਵਾਈ ਕਿਰਾਏ ਵਧਣ ਦਾ ਇੱਕ ਮੁੱਖ ਕਾਰਨ ਵਿਸਤਾਰਾ ਵੱਲੋਂ ਉਡਾਣ ਸੰਚਾਲਨ ਵਿੱਚ ਕਮੀ ਹੈ। ਇਸ ਤੋਂ ਇਲਾਵਾ ਈਂਧਨ ਦੀਆਂ ਵਧਦੀਆਂ ਕੀਮਤਾਂ ਦੇ ਨਾਲ-ਨਾਲ ਗਰਮੀਆਂ ਦੀ ਯਾਤਰਾ ਦੀ ਵਧਦੀ ਮੰਗ ਨੇ ਵੀ ਕਿਰਾਏ ਵਧਾਉਣ ਵਿਚ ਭੂਮਿਕਾ ਨਿਭਾਈ ਹੈ।